«Los viaxes de Gulliver» n’asturianu

 

Gonzali Producciones y Berona Entertaiment realizaron a comuña'l primer doblaxe al asturianu d'un llargumetraxe d'animación, que van sacar a la venta, dica poco, y en formatu DVD.
 
Trátase de LOS VIAXES DE GULLIVER (Gulliver's Travels), que foi'l primer llargumetraxe d’animación producíu polos Estudios Paramount, y tamién foi’l primer film d’esti xéneru que nun taba venceyáu a los Estudios Disney.
La película dirixóla Dave Fleischer y producióla’l so hermanu Max Fleischer, dos pioneros del cine animáu que nos años cuarenta fueron mui populares polos sos curtiometraxes de Superman.
 
Los guionistes Dan Gordon, Cal Howard, Tedd Pierce, Edmond Seward y Izzy Sparber encargáronse de treslladar a la gran pantalla una parte de la novela de Jonathan Swif, centrada na aventura de Gulliver nel país de Lilliput.
Los animadores emplegaron la técnica del rotoscoped en determinaes escenes, aportando un notable realismu al film, que tien una estupenda calidá d’animación y un bon tratamientu del collor.
 
Na estaya musical ye destacable la banda sonora de Victor Young y que-y valiera a la película dos nominaciones a los Oscar a Meyor banda sonora y Meyor canción orixinal (pol tema "Faithful Forever").
Pa esti doblaxe Gonzali Producciones y Berona Entertaiment cuntaron cola participación d'actores asturianos.