Xune Elipe presentó’l vienres 17, na sé de la SGAE n’Uviéu, l’Anuariu de la Música Asturiana 2010

La revista, editada por Publicaciones Ámbitu, va vendese en tolos quioscos d’Asturies y na páxina web tienda.ambitu.com a un preciu de 5 euros

 Xune Elipe, director del sellu discográficu L’Aguañaz, presentó’l vienres 17 d’avientu, na sé de la Sociedá Xeneral d’Autores y Editores (SGAE) d’Uviéu, l’Anuariu de la Música Asturiana 2010, editáu por Publicaciones Ámbitu. Na so intervención, Xune Elipe fixo un repasu pelos conteníos de la publicación, un clásicu d’estes feches pa tolos aficionaos a la música asturiana. Tamién esplicó que l’Anuariu de la Música Asturiana ta disponible nos quioscos asturianos dende’l mesmu vienres 17 d’avientu a un preciu de 5 euros, y que tamién pue adquirise na páxina web www.ambitu.com, entrando nel apartáu «Tienda».

L’editorial d’esti númberu nuevu del Anuariu de la Musica Asturiana ta dedicáu a les infraestructures culturales que s’asitien nel país y a los sos conteníos que, según la publicación, «bien de veces dexen de llau o desdexen la presencia de los grupos y intérpretes asturianos».

Ente los sos conteníos destaquen, por exemplu, artículos sobre Corquiéu, Blima, Falanoncaduca, Skontra, Güextia, etcétera; reportaxes sobre’l Premiu al Meyor Cantar n’Asturianu d’esti añu, que se desenvolvió en Mieres y que ganó la formación Xera; entrevistes con Skama la Rede o Misiva; crítiques de discos como’l nuevu d’Anabel Santiago; informes sobre la edición númberu cuarenta del Festival Intercélticu de Lorient;
o una alcordanza sobre’l músicu Fernando Largo, que morría hai unos meses.
 

Nun va faltar tampoco la sección llamada «Collecha», onde se fai un recuentu exhaustivu de tolos discos, publicaciones y audiovisuales que tienen a la música asturiana como protagonista. Nesti sen, faise un repasu de les cerca de trenta producciones discográfiques de música tradicional, folk o soníos contemporáneos n’asturianu publicaes nesti añu 2010, amás d'a los ocho llibros o revistes y los tres DVD o videoclips que foron apareciendo nestos doce meses.